Gerrie Coetzee Article | Burger Articles

DIE BURGER ARTICLES

MANAGEMENT & DESIGN: WWW.UNIQUEWEBS.CO.ZA

INDEX PAGE

SKOP DIE HOOF UIT Die Burger, 2 Maart 1987, Gerrie Coetzee, voormalige WBA-swaargewig-wêreldkampioen en oud-leerling van die Hoërskool E.G. Jansen in Boksburg, sê die hoof van dié skool moet ``uitgeskop'' word, omdat hy besluit het sy leerlinge mag nie aan gemengde sport deelneem nie. Hy het gesê hy sal bereid wees om te help met die loopbaan van Francis Tee, wat verlede jaar die o. 17-hekkieskampioen was, nadat Tee laat blyk het dat hy ``ontsteld'' is oor die skool se besluit. Coetzee het gesê die skoolhoof, mnr. Pieter Conradie, behoort ``vroeg af te tree'' nadat hy geweier het dat sy skool saam met ander skole aan 'n veelrassige aflos-padwedloop in Sandton deelneem. ``As dít hul houding is, wil ek my nie met hulle vereenselwig nie. Ek sal nie my erekleure-baadjie dra voordat hulle van besluit verander het nie.'' Dié baadjie is in 1979 aan Coetzee toegeken, nadat hy Leon Spinks in 'n uitdungeveg om die WBA-wêreldtitel in Monte Carlo uitgeslaan het. Hy het die skool in 1971 verlaat. ``Die Regering het in die verlede al baie wette oor apartheid gemaak. Hy moet nou 'n wet maak wat sal keer dat onnosel, kinderagtige mense foute begaan wat 'n blywende indruk op kinders sal laat,'' het Coetzee gesê. - (Sapa)

GERRIE COETZEE IS REG VIR DIE KRYT Hennie Brandt, Die Burger, 24 November 1992 JOHANNESBURG. Gerrie Coetzee is vuur en vlam vir sy hertoetrede tot die bokskryt. Dié gewese swaargewigkampioen van die Wêreldboks-vereniging (WBA) het reeds begin oefen en beplan om vroeg in die nuwe jaar in Amerika deur die toue te klim. Maar 'n ander gewese Suid-Afrikaanse wêreldkampioen, Brian Mitchell, het sy planne laat vaar om tot die kryt terug te keer. Mitchell, 'n gewese junior liggewigkampioen van die WBA en die Internasionale Boksfederasie (IBF), sou 'n hertoetrede gemaak het om sy aartsvyand Tony Lopez die stryd aan te sê om die WBA se liggewigtitel. ``Ek sou vir groot geld in Suider- Afrika teen Lopez geboks het. Dit was al rede waarom ek 'n terugkeer sou gemaak het. Lopez wil egter vir geen geld ter wêreld teen my boks nie. ``Hy verkies eerder om sy titel teen Dingaan Thobela te verdedig. Ek stel dus nie verder belang om weer te boks nie. As Lopez egter môre instem om teen my te veg en ek kry die geld wat ek wil hê, sal ek beslis weer boks,'' het Mitchell gister gesê. Die 37-jarige Coetzee, wat in Maart 1986 aan sy laaste geveg deelgeneem het toe Frank Bruno hom in die eerste ronde in Londen uitgeslaan het, oefen egter al vyf weke ernstig vir sy terugkeer. Dit sluit pad-, skerm- en gewone gimnasiumwerk. ``Die eerste drie weke was nie maklik nie, maar dit gaan nou beter,'' het Coetzee gesê, wat op die oomblik nagenoeg 109 kg weeg. Hy hoop om die skaal op 105 kg te trap wanneer hy weer in die kryt klim. Coetzee, sy vrou, Rina, en die drie kinders vertrek vroeg aanstaande maand na Amerika waar die Amerikaner Ken Adams hom sal afrig vir sy eerste twee gevegte. ``Ek sal my eerste twee teenstanders self kies voor die groot geveg hopelik in Maart of April aanbreek. Dan sal my teenstander waarskynlik George Foreman, Larry Holmes of selfs Frank Bruno wees. Ek gaan alles in die stryd werp en my beste lewer, maar as ek in my eerste geveg agterkom alles is nie pluis nie, sal ek dadelik ophou.'' Sy vrou is nie juis opgewonde oor haar man se planne nie. Voordat Coetzee na Amerika vertrek, gaan hy twee weke lank aan die Natalse noordkus hengel.

RINA SE KOMMER NOU VERBY Die Burger, 7 Maart 1987, V an Ons Korrespondent JOHANNESBURG . - Hees van aandoening oor sy skok-nederlaag in Londen teen Frank Bruno en met die belofte dat hy na twintig jaar nou finaal klaar is met boks, het Gerrie Coetzee (30) gisteroggend op die lughawe Jan Smuts aangekom. Gerrie het sy vrou, Rina, en sy drie kinders beloof dat die dae van doodskommer oor hom nou finaal verby is. Vergete is Rina se kommer oor breintoetse, vitamienpille, bloeddruktoetse en die vroeg opstanery wat sy so pligsgetrou gedoen het. BESEF DIE ANGS - Met haar kroos van die drie styf teen hul ma het Rina Coetzee gesê sy was nog nooit in haar lewe so verlig soos na haar man se aankondiging dat hy boks finaal vaarwel toegeroep het nie. “Niemand besef die angs nie. Daar wag ñ nuwe lewe op ons,” het sy gesê. Gerrie se geld is volgens hom goed belê en hy is nie vuisvoos soos baie mense dink nie. “Ek gaan beslis nie soos Muhammad Ali in ñ twee slaap kamer woonstel eindig wat ek met ander mense moet deel nie,” het Gerrie gesê. IN DIE KRYT WAAG - Al waarna hy nou uitsien, is die groot partytjie wat hy vir al sy vriende by Sun City wil hou om dankie te sê vir die onderskraging deur die jare. As hy dit weer in die kryt waag, sal strawwe brein toetse sy voorland wees. Die voorsitter van die Suid-Afrikaanse Boks beheerraad en vise- voorsitter van die Wêreldboks vereniging, regter W.H.O. Klopper, het gisteroggend op die lughawe Jan Smuts gesê Coetzee se besluit om uit te tree, is een van die wysstes wat hy nog geneem het, “Ons moet onthou wat Gerrie vir Suid-Afrikaanse boks gedoen het. Hy sou net ñ slaansak vir ander boksers geword het as hy voort gegaan het. Hy het miskien die geveg verloor, maar beslis ñ geveg vir sy vaderland gewen,” het regter Klopper gesê. VERLORE TYD - Volgens Gerrie en regter Klopper sou die SA Boks beheerraad dit nooit toegelaat het dat hy vuisvoos in die kryt verskyn nie. “My vrou en kinders is deur baie. Hulle het vir my gebid, my getroos en versorg. Van nou af gaan ek die verlore tyd inhaal. Ek is dit aan hulle verskuldig, “ het Gerrie gister geseê. Hy het al sy vriende - en vyande, soos sy gewese bestuurder Hal Tucker wat nou weens bedrog in die tronk sit - uitgenooi na die makietie wat hy by Sun City wil hou. RENPERDE - “ Dit is met trane in my oë dat ek van baie mense afskeid neem. Miskien sal ek die aand van die finale afskeid ñ vertoon geveg lewer. Ek weet nog nie. Die skrif is egter aan die muur. Ek moet ophou voordat dit te laat is,” het Gerrie gesê. Coetzee besit ñ groot vervoer - en - bande - onderneming, asook renperde waaraan hy nou heeltyds sy aandag gaan bestee. Gerrie het gesê hoewel hy en die SA Boks beheerraad baie verskille tydens sy loopbaan gehad het, hy hom wil bedank dat hy gehelp het om hom die eerste aanspraak maker op die wêreld titel te hou na sy nederlaag teen Greg Page. ‘KOUD GESLAAN’ - Oor sy nederlaag teen Frank Bruno het Gerrie nie verskonings nie. Hy het gesê dit het vir hom gevoel of hy hom in ñ kanon koeël vasloop. “Dit was net my eer wat my die eerste keer laat opstaan het. Ek was die eerste keer koud geslaan,” het hy gesê. In teenstelling met vorige kere was daar gister nie ondersteuners om Gerrie op die lughawe te verwelkom nie. Sowat veertig sub A’tjies van ñ Oos-Randse laer skool wat toevallig op die lughawe was, het belangstellend toe gekyk. Toe hulle besef dis die gewese swaar gewig wêreld kampioen, het hulle spontaan hande geklap. Gerrie het met twee van sy kinders op die arm en met trane in die oë van die balkon vir hulle gewuif. So sal hulle hom nie weer sien nie. Hy is finaal klaar........